Қалбларда байрам шукуҳи

«Ўзэлтехсаноат» акциядорлик компаниясида Ватанимиз мустақиллигининг 27 йиллиги муносабати билан “Мустақиллик менинг тақдиримда” мавзусида байрам тадбири бўлиб ўтди. Тадбир “Ўзэлтехсаноат” акциядорлик компанияси Ёшлар Етакчилар кенгашининг “Фарзандлик бурчим” лойиҳаси доирасида амалга оширилди. Тадбирга корхоналар раҳбарлари ва уларнинг ходимлари таклиф этилди.

«Ўзэлтехсаноат» АК Бошқарув раисининг биринчи ўринбосари М. Хашимов, Ўзбекистон Металлургия ва машинасозлик тармоқлари ходимлари Касаба уюшмаси раиси А.Хаққуловлар буюк ва бебаҳо неъмат – мустақиллигимизнинг миллий тараққиётимиз, бугунги ва келгуси авлодлар тақдири, келажаги учун беқиёс аҳамияти ҳақида гапириб ўтдилар. Шу йиллар давомида халқимиз манфаати таъминланиб, тинч ва осуда ҳаётга эришилди, давлатимизнинг халқаро миқёсдаги обрў-эътибори янада юксалди. Айниқса, электротехника саноати йўналишида эришилган ютуқлар тилга олинди.

Тадбир кўтаринки руҳда ўтди. Унда истиқлолнинг тарихий, ижтимоий-сиёсий, маънавий аҳамияти, юртимизда ҳукм сураётган тинчлик ва осойишталикнинг қадрига етиш, мамлакатимизда кам таъминланган оилаларга ижтимоий ёрдам кўрсатиш, хотин-қизлар, ёшларни ҳар томонлама қўллаб-қувватлаш борасида амалга оширилаётган ишлар кўлами ва самаралари хусусида сўз борди.

Тадбир доирасида корхоналар раҳбарлари ва уларнинг фаол ходимларига Мустақилликнинг 27 йиллик байрами муносабати билан ташаккурномалар топширилди. Байрам тадбири бир пиёла чой устида давом этди.